काठमाण्डाै – नेकपा (एमाले) को स्थायी समिति सदस्य कर्ण थापाले पूर्वराष्ट्रपति विद्यादेवी भण्डारीकाे पक्षबाट चार विषयमा फरक मत राख्नुभएको छ । थापाले आज एमाले केन्द्रीय कार्यालयमा फरक मत दर्ता गराउनुभएको हो ।
एमाले केन्द्रीय कमिटीको पछिल्लो बैठकले पूर्वराष्ट्रपति भण्डारीलाई राजनीतिमा आउन रोक्ने निर्णय गरेकोमा थापाले त्यसमा फरक मत दर्ता गराउनुभएको हो । भण्डारीलाई पार्टी राजनीतिमा फर्कन रोक्ने एमाले केन्द्रीय कमिटीको निर्णयमा वरिष्ठ उपाध्यक्ष ईश्वर पोखरेल, उपाध्यक्ष सुरेन्द्र पाण्डे, युवराज ज्ञवालीले पनि फरक मत र अभिव्यक्ति दिँदै आउनुभएको छ ।
एमालेको दोस्रो विधान महाधिवेशन भोलिदेखि ललितपुरको गोदावरीमा शुरू हुँदैछ । विधान महाधिवेशनको तयारी पूरा भएको एमालेले जनाएको छ ।
