पश्चिमी सुडानको मार्रा पर्वत क्षेत्रमा ठूलो पहिरोमा परेर करिब एक हजार जनाको ज्यान गएको छ । सुडान लिबरेसन मुभमेन्ट/आर्मीले हिजो निकालेको वक्तव्यमा पहिरोमा परी गाउँ नै पूर्ण रूपमा ध्वस्त भएको र एक व्यक्ति मात्र जीवित भेटिएको खबर सीएनएनले लेखेको छ ।
गएको तीन दिनदेखिको लगातारको वर्षापछि आएको पहिरोले गाउँ नै पुरिएको खबरमा भनिएको छ । संयुक्त राष्ट्रसङ्घ र अन्तर्राष्ट्रिय राहत संस्थाहरू समक्ष ज्यान गुमाउनेहरूको शव उद्धार गर्न तथा सहयोग उपलब्ध गराउन आग्रह गरिएको छ ।
सुडानी सेनामाथि सङ्घर्षरत अर्धसैनिक द्रुत सहयोग बल आरएसएफसँगको लडाइँका कारण उत्तरी दर्फुर राज्यबाट विस्थापित भएका नागरिकहरु मार्रा पर्वत क्षेत्रमा शरण लिन पुगेका थिए । सुडानमा दुई वर्षदेखि चलिरहेको गृहयुद्धका कारण आधा जनसङ्ख्या खाद्य सङ्कटको चपेटामा परेको छ भने लाखौं नागरिक घरबारविहीन बनेका छन् ।
उत्तरी दर्फुर राज्यको राजधानी अल–फाशिर अहिले तीव्र युद्धको बीचमा रहेको रोयटर्सले जनाएको छ ।
