जित जङ्ग कटेल/ बाजुरा, मंसिर ९ । बाजुरा जिल्लाको स्वामीकार्तिक खापर गाउँपालिकाले तीन बुँदे माग सहित सुदूरपश्चिम प्रदेश मुख्यमन्त्री कमलबहादुर शाहलाई ज्ञापन–पत्र बुझाएको छ । सुदूरपश्चिम प्रदेशका मुख्यमन्त्री कमलबहादुर शाहलाई विशेष ज्ञापन–पत्र बुझाएको गाउँपालिकाकी उपाध्यक्ष सुलोचना भण्डारीले बताउनुभयो । २०३३ साल अघिसम्म जुम्लासँग, २०३८ सालसम्म कालिकोटसँग र त्यसपछि पनि यातायातका हिसाबले सुदूरपश्चिम सँग नजोडिएको क्षेत्र पुस्ताले पुस्तौँदेखि यातायात अभावको मारमा सहनुपरेको जनाएको छ।
कर्णाली पुननिर्माणका लागि प्रदेश सरकारबाट विनियोजित बजेट सुनिश्चित गर्दै डीपीआरअनुसार यथाशक्य छिटो ठेक्का प्रक्रिया अघि बढाउने । मुगुको खत्याड गाउँपालिकाको झुगला हुँदै जेरा, देउरा मन्दिर, सुईजिउला, भाम, मुक्तिकोट, फयालगाउँ हुँदै कालिकोटको पलाता गाउँपालिका रानीविसौना पुलाहा सम्मको मोटरबाटो निर्माणका लागि आवश्यक बजेट व्यवस्था गर्ने।
प्राचीन कैलाश–मानसरोवर मार्गको प्रवर्द्धन गर्दै पिलुपादुका देखि देउरा मन्दिर जोड्ने जिपलाइन परियोजनालाई आगामी आर्थिक वर्षमा बजेट विनियोजन गरी अघि बढाउने । गाउँपालिकाले दीर्घकालीन विकासका लागि सडक पहुँच अत्यावश्यक भएकोले प्रदेश सरकार तर्फबाट पहलको अपेक्षा राखेको जनाएको छ ।
