कैलाली – कैलालीको लम्कीचुहामा जुत्ताचप्पलको गोदाममा आगलागी भएको छ । आगलागीबाट ७० लाख रुपैयाँभन्दा धेरैको क्षति भएको प्रहरीको प्रारम्भिक अनुमान छ ।
लम्कीचुहा नगरपालिका–१ लम्की टीकापुर रोडमा रहेको कल्पना ट्रेडर्स एण्ड सप्लायर्समा गएराति आगलागी भएको हो । आगो लम्कीचुहा नगरपालिकाको दमकल, प्रहरी र स्थानीयबासिन्दाको सहयोगमा निभाएको इलाका प्रहरी कार्यालय लम्कीका प्रमुख प्रहरी निरीक्षक लोकेन्द्रबहादुर सिंहले बताउनुभयो ।
गोदाम कल्पना जैशीले सञ्चालन गर्दै आउनुभएको थियो । आगलागीबाट गोदाममा रहेका सम्पूर्ण सामान जलेर नष्ट भएको प्रहरीको भनाइ छ । आगो लाग्नुको कारण खुल्न सकेको छैन ।
