बाजुरा — नेपाली कांग्रेस बाजुरा जिल्ला प्रदेश ‘क’ को सभापतिमा महेश कटेल निर्वाचित भएका छन्।
प्रदेश ‘क’ को सभापति पदका लागि भएको निर्वाचनमा कुल ५६० मत खसेको थियो। प्राप्त मतपरिणामअनुसार कटेलले २०० मत प्राप्त गर्दै सभापति पदमा निर्वाचित भएका हुन्। उनका प्रतिस्पर्धी जय अधिकारीले १५८ र छत्र मल्लले १६६ मत प्राप्त गरेका छन्।
कटेल यसअघि नेपाली कांग्रेस स्वामीकार्तिक खापर गाउँपालिकाका पार्टी सभापतिका रूपमा जिम्मेवारीमा रहेका थिए। गाउँपालिका पार्टी सभापतिको जिम्मेवारी सम्हाल्ने क्रममा उनले पार्टी संगठन विस्तार, कार्यकर्ता परिचालन तथा संगठनलाई मजबुत बनाउन निर्वाह गरेको भूमिकाकै आधारमा प्रदेश सभापतिमा पनि प्रतिनिधिहरूले विश्वास गरेको बताइएको छ।
पार्टीप्रति निष्ठावान, इमानदार र संगठन निर्माणमा सक्रिय नेतृत्वका रूपमा आफ्नो भूमिका अघि बढाउने कटेलले बताएका छन्। आगामी दिनमा सबै नेता तथा कार्यकर्तालाई समेट्दै नेपाली कांग्रेसको संगठनलाई अझ बलियो, एकताबद्ध र जनमुखी बनाउने उनको धारणा रहेको छ।
प्रदेश ‘क’ को सभापतिमा निर्वाचित भएसँगै कटेलले आफूलाई विश्वास गरी मतदान गर्ने सम्पूर्ण प्रतिनिधिहरूप्रति धन्यवाद व्यक्त गर्दै आगामी दिनमा सबैको साथ र सहकार्य आवश्यक रहेको बताएका छन्।
नेपाली कांग्रेस बाजुरा प्रदेश ‘क’ को सभापतिमा महेश कटेल निर्वाचित
